Blason
(page 161, extrait)

Le voyla pourtant, je le voy, voyla, le voyla, MON VICTORIEUX, ô qu'au naïf & au naturel ! ô front relevé, venerable, front vray tableau d'honneur, throsne de bienseance, theatre de Majesté ! O yeux, ô beaux yeux, tous traits & attraits ; yeux doux, yeux fuzils & allumettes, flambeaux & lumieres d'amour, le rendez-vous & le sejour des graces, yeux, ô doux yeux en temps calme et serain ! Mais en orage et tourmente, ô yeux la tourmente, & l'orage mesmes ; ouy l'eclair, ouy le foudre en ces yeux ardens ; foudre, & tout autre foudre que celuy, qu'on voit en la pierre Astrapias ! Nez Royal, ô nez aquilin, tiltre des mieux marquez entre les tiltres de Dieu ; marque d'honneur entre les Roys de Perse : si privilegié, & de telle mise entre les Grecs, que comme on apelloit l'homme de bonne memoire Memnon ; un victorieux Calinicos ; & celuy aussi qui avoit le nez Aquilin, Grypos. Douce gravité, comme l'image d'amour, qui tenoit un foudre à la main sur le bouclier d'Alcibiades, ô la grave douceur de son visage ! ô la venerable hautesse de sa Majesté Royale ! Corps, ny petit, comme celuy qui ne portoit point, mais qui estoit porté par son espée ; ny grand comme ceux qui au dire d'Hippomachus, ne sont bons que pour attaindre en haut lieu, le prix des Victorieux : mais, ô corps ou toutes les parties en proportion, toutes en perfection, toutes à niveau, toutes à compas ; & tout tel que Plutarque nous represente ce beau corps du Roy Demetrius ! Et qui parmy tant de rares beautez, qui ne se souviendroit, que de deux Alexandres, le fils de Philippe estoit invincible, & celuy d'Apelles inimitable ? Et si les oyseaux aux raisins de Zeuxis ; si Zeuxis au rideau de Parrhasius ; & que Parrhasius ne seroit point trompé en ce trompeur image ?